Калі спытаць дзетак, да якой групы адносяцца грыбы, яны, без сумневу, адкажуць — да раслінаў. І яшчэ паспрабуюць пераканаць у гэтым маму і тату. Зацікаўце дзіця тым, што грыбы гэта і не расліны, і не жывёлы. І спакойна выслухайце дзіцячыя думкі на гэты конт. Распавядзіце, што клетка грыба па сваёй будове больш нагадвае клетку жывёлы, напрыклад, жука ці скарпіёна.

Спытаеце дзетак: дзе часцей за ўсё ў лесе можна сустрэць грыб? Чаму часцей яны сустракаюцца пад дрэвамі? Тут можна адзначыць яшчэ адно адрозненне грыбоў ад раслін. Грыбы не могуць забяспечыць сябе ўсімі патрэбнымі рэчывамі, як гэта робяць расліны, таму многія з іх імкнуцца сябраваць з дрэвамі, каб праз іх карані атрымліваць тыя прадукты, якіх ім не хапае.

Абавязкова распавядзіце пра ядомыя і атрутныя грыбы. У гэтым вам дапамогуць загадзя падрыхтаваныя карткі-фатаграфіі ці наша сённяшняя прэзентацыя.

Лепшым спосабам замацавання інфармацыі пра грыбы — будзе сапраўдны сямейны паход у лес.

Перад гэтым азнаёмце дзетак з правіламі паводзін у лесе. Першым чынам, дзіця павінна цвёрда зразумець, што ад дарослых нельга адставаць — калі ўсё захопленыя пошукамі грыбоў, вельмі лёгка згубіцца.

Таксама трэба навучыць дзяцей правільна “збіраць” грыбы. Пасля таго, як кошык дзіцяці будзе поўны грыбоў, варта правесці “працу над памылкамі”: разабраць грыбы, якія сабрала дзіцё, і растлумачыць, у чым ёсць памылкі.

Абавязкова, перш чым ісці ў лес, дзіцяці трэба нагадаць, што грыбы нельга есці сырымі, ды і брудныя рукі ў рот браць ні ў якім разе нельга.